Форма поиска
«Яңгыра, керәшен җыруы» китабы «Мәгариф-Вакыт» нәшриятында 300 данә белән чыккан. Әлеге ноталы китапның авторы – фольклорчы, Татарстанның атказанган сәнгать эшлеклесе, сәнгать фәннәре кандидаты Геннадий Макаров. Җыентыкта Татарстан, Самара, Оренбург, Чиләбе өлкәләре һәм Башкортстандагы керәшеннәрнең җыр сәнгатенә хас халык җырлары тупланган.
«Китапта Татарстандагы 300 авыл, Самара, Оренбург, Чиләбе өлкәләрендә һәм Башкортстанда күмәк рәвештә көн күрүче керәшеннәрнең җыр сәнгатенә хас халык җырлары бирелде. Җыр текстларында диалект, җирле сөйләм үзенчәлекләре саклануга игътибар ителде, җыр сүзләренең язылышы әдәби орфография нормалары белән туры килмәскә дә мөмкин», - ди җыентык турында китап авторы.
Яңа китап керәшен орфографиясендә интернетта да урнаштырылган. «Китап материалларын әзерләгәндә балалар һәм үсмерләр коллективларының керәшен җырларына булган ихтыяҗлары исәпкә алынды. Җыентыкка халык көйләре һәм тарихи, дини тематика буенча иҗат ителгән җырлар кертелде. Бу эшкәртмәләр музыка һәм сәнгать мәктәпләре, балалар иҗат үзәкләрендә оештырылган фольклор ансамбльләрендә катнашкан балаларның башкару мөмкинлекләреннән чыгып эшләнде», - ди Геннадий Макаров.
Шушы көннәрдә генә Яков Емельянов исемендәге мәдәни үзәктә әлеге җыентыкны тәкъдим итү чарасы үтте. Кичәдә китапка кертелгән көйләрне Нәҗип Җиһанов исемендәге консерваториянең фольклор ансамбле, «Бәрмәнчек» дәүләт фольклор ансамбле, Казан дәүләт мәдәният институтының «Җомга кич белән» ансамбле, «Балтырган» балалар ансамбле һәм башкалар яңгыратты.
Башка яңалыклар
21.01.2026
