Әтнә районы Ары авылында  «Бәрәңге бәйрәме» гөрләде

9 август көнне Әтнә районы Ары авылында онытыла барган йоланы торгызу, саклап калу һәм киләчәк буынга тапшыру максатыннан «Бәрәңге бәйрәме» узды.

Әлеге бәйрәмдә төрле милләт вәкилләреннән торган иҗат коллективлары катнашты: Татарстан республикасының Казан шәһәре башкортлар ассоциациясеннән «Дуслык» башкорт фольклор ансамбле, Лаеш районыннан «Русская душа» халык вокаль ансамбле, Теләче районыннан «Нардуган» керәшен халык ансамбле, Балтач районыннан «Шулдыр жыт» удмурт халык фольклор ансамбле, Биектау районыннан «Шихаль» чуваш вокаль ансамбле.

Иҗат коллективларына үзенең рәхмәтен белдереп Әтнә районы Башкарма комитеты җитәкчесе Хисамиев Рөстәм Шәһит улы Татарстан республикасы районнарының мәдәният бүлеге җитәкчеләренә рәхмәт хаты тапшырды. Чарада «Татарстанның мәдәниятне үстерү үзәге» вәкилләре Миләүшә Насыйбуллина һәм Гөлназ Гыйльфанова да катнашты. Алар бәйрәмне оештыручыларга үзәкнең бүләкләрен тапшырды.

Бәйрәмне шулай ук тематик күргәзмәләр, осталык дәресләре, бәрәңге белән бәйле уеннар бизәде.

Бәйрәмебезнең махсус кунагы, Татарстанның атказанган артисты Гөлнара Тимерҗанова бәйрәмгә ямь өстәде. Бәйрәм ахырында мәйдан уртасында, бәйрәмнең фишкасы булган «Мундирда пешкән бәрәңге» белән кунаклар сыйланды.