Теләче районында үзешчән һәм халык театрлары смотр-конкурсы бара

24 январь көненән башлап Теләче районы мәдәният учакларында зур оешканлык һәм уңыш белән үзешчән һәм халык театрлары смотр-конкурсы бара. Әлеге смотр-конкурс районда театр сәнгатен үстерү, популярлаштыру, талантларны барлау, халык, бигрәк тә үсеп килүче буын күңелендә әхлакый рухи кыйммәтләр, ватанпәрварлек хисе тәрбияләү максатыннан үткәрелә.

Район мәдәният йортлары һәм авыл клублары каршында эшләп килүче театр колективлары үзләре сайлап алган әсәрләрне сәхнәләштереп мәртәбәле жюрига тәкъдим итә.

Бәйгене Югары Мәтәскә авыл клубы башлап җибәрде. Алар Гата Нуруллинның «Картаямыни соң йөрәк» дип исемләнгән музыкаль комедиясен сәхнәләштерделәр. Зал тутырып килгән тамашачылар әлеге спектакльне бик яратып карады.

Караширмә һәм Күкчә авылы үзешчәннәре авылдашлары алдында Халисә Мөхәммәтдинованың ата-аналар һәм балалар арасындагы мөнәсәбәтләрнең кискен булуын, әби-бабадан сакланып килгән рухи һәм әхлакый кыйммәтләрнең халкыбыз арасында әкренләп юкка чыга баруын сурәтләгән «Гафу итә алсаң, әгәр…» әсәре белән чыгыш ясадылар.

Шәтке авылы мәдәният йортының «Шатлык» халык театры Туфан Миңнуллинның «Әлдермештән Әлмәндәр» спектаклен авылдашларына тәкъдим итте. Зал тутырып килгән тамашачы аларны алкышларга күмде.

Урта Мишә, Ямбулат һәм Лесной бистәсе авылы үзешчәннәре дә мәртәбәле жюри, авылдашлары алдында имтихан тотарга өлгерде инде.

Ямбулат авыл клубы да 7 февраль көнне тамашачылар белән шыгрым тулы иде. Капиталь ремонттан соң сәхнәдә тәүге тапкыр спектакль куелды. Бу көнне алар тамашачыга Фоат Садриевның «Безнең авылның кызлары» исемле ике кисәктән торган драмасын тәкъдим итте. Бөек Ватан сугышы елларында әби-бабаларыбызның тылдагы хезмәт батырлыгын сүрәтләгән әлеге әсәрне олысы да, кечесе дә яратып карады.

Бәйге кызганнан-кыза бара. Алда чыгыш ясаучылар арасында, республикакүләм конкурста җиңүчеләр булу, аңа тагы да кызыклы төсмерләр өсти. Алар арасында, 2025 елда Ш. Закиров исемендәге XXV Төбәкара «Идел-йорт» республика конкурсында катнашып 3 призлы урынга лаек булган Сөләйман Йосыпов исемендәге Алан авыл Мәдәният йорты каршында эшләп килүче «Умырзая» театр төркеме дә бар. Режиссеры авыл Мәдәният йорты директоры Замалиева Гүзәлия булган бу коллектив конкурста Исламия Мәхмүтованың «Мәхәббәт чишмәсе» спектакле белән катнашты. Ә район бәйгесенә алар Мансур Гыйләҗевның «Казан егетләре» комедиясен әзерлиләр.

Җиңүчеләрне бүләкләү 27 март – Бөтендөнъя театр көнендә булачак.