Театраль фестиваль кысаларында Апас Мәдәният йортында сәхнә теле буенча мастер-класс үтте

14 октябрь көнне Апас Мәдәният йорты сәхнәсендә татар әдәби телебезнең сафлыгы сагында торучы сәхнә теле остасы Гаптрәүф Салих улы Нуриев җитәкчелегендәге Казан театр училищесының IV курс студентлары тарафыннан сәхнә теле буенча мастер-класс үтте.

Гаптрәүф Нуриев 1977 елда татар сәхнә теле укытучылары мәктәбенә нигез салган. Ул Татарстан Республикасының атказанган артисткасы һәм сәнгать эшлеклесе, беренчеләрдән булып Габдулла Тукай исемендәге Татарстан Республикасының дәүләт бүләгенә лаек булган Асия Хәсән кызы Хәйруллинаның укучысы һәм аның хезмәтен дәвам итүче.

Апас Мәдәният йортында узган чарада булачак сәхнә йолдызлары тарафыннан татар әдәби теленең яңгырашы, татар драма әсәрләренең әдәби яктан эшләнеше, тел чараларының сәнгати кулланышы мәсьәләләренә аеруча игътибар бирелде. Алар профессиональ дәрәҗәдә әдәби сөйләмебезнең нечкәлекләрен, сәхнә теленең алым-күнекмәләрен күрсәтте. Бу мастер-класс – һөнәрләре сөйләм белән бәйле кешеләргә бик тә кирәкле чара булды.

Апаслылар театр сәнгатен үстерүгә, татар телен саклауга һәм яшьләргә сәхнә телен өйрәтүгә бәяләп бетергесез хезмәт куючы остаз Гаптрәүф Нуриевка олы рәхмәтләрен белдерә.