«Таяну ноктасында» халык һөнәрчелеген үстерү турында фикерләштеләр

Сишәмбе, 28 март кичендә ТНВ каналында узган «Таяну ноктасы» тапшыруында бик кызыклы темага фикер алыштылар. Студия кунаклары татар халкының традицион кәсепчелеге, халык һөнәрчелеге, аларны саклау һәм үстерү турында сөйләште.

Тапшыруда «Татарстан мәдәният ресурс үзәге» директоры урынбасары Гөлназ Латыпова да катнашты. Ул һөнәрчеләрне традицион татар кәсепчелеген онытмаска, элеккеге технологияләрне һәм эш ысулларын торгызырга, югары сәнгати дәрәҗәдәге эшләнмәләр ясарга чакырды. «Ел саен Татарстан хөкүмәте халык һөнәрчелеге юнәлешендә эш итүче 12 затка грант бирә. Аны алу буенча конкурста һәркем катнаша ала. Республиканың Мәдәният министрлыгы тарафыннан оештырылган экспертлар исә бу бәйгедә катнашучылар арасыннан иң лаеклыларын сайлап ала», - дип сөйләде Гөлназ Латыпова. Һәм студия кунакларына да, башка кәсепчеләргә дә әлеге грантларны алу өчен бәйгедә катнашырга тәкъдим итте.

«Таяну ноктасына» килгән һөнәрчеләр исә үзләренең продукциясе  белән таныштырды, эшчәнлекләрендә туган авырлыклар белән уртаклашты.

Студиянең тагын бер кунагы – Казанның халык һөнәрчелеге техникумы җитәкчесе Раушания Саубанова үзләренең уку йортында ничек итеп һөнәрчеләрне әзерләүләре турында сөйләде. «Безнең уку йортын тәмамлаган яшьләр берсе дә эшсез утырмый. Алар һәркайсы үзләренең күңеленә туры килгән эш таба», - дип белдерде ул.