«Татарча диктант» акциясенә син дә кушыл!

Бүгенге көндә «Татарча диктант» акциясе Татарстан Республикасы, Россия Федерациясе субъектлары һәм чит илләрдә яшәүче милләттәшләребезне берләштерә торган проектларның берсе. Соңгы елларда акция 31 илдә һәм Россия Федерациясенең 74 төбәгендә яшәүче милләттәшләребез катнашында уза. Татарстан Республикасының барлык районнары, Казан шәһәренең югары уку йортлары һәм төрле оешмалары әлеге чарага киң аудиторияне җәлеп итәр өчен күп көч куялар.

Акциянең максаты – татар телен саклау һәм аны киң җәмәгатьчелек арасында популярлаштыру, телне белү дәрәҗәсен күтәрү, татар телен өйрәнүгә кызыксыну уяту, шулай ук татар халкының милли үзаңын һәм мәдәни үзенчәлеген ныгыту.

Акцияне оештыручылар: Татарстан Республикасы Яшьләр эшләре министрлыгы, Бөтендөнья татар яшьләре форумы, Бөтендөнья татар конгрессының Башкарма комитеты, Казан (Идел буе) федераль университеты, «Яңа гасыр» телерадиокомпаниясе. Акциянең партнерлары: Татарстан Республикасының Мәгариф һәм фән, Мәдәният министрлыклары.

Быел «Татарча диктант» акциясе 14-16 ноябрь көннәрендә Мәскәү вакыты белән 10:00 сәгатьтә узачак.

Акция өч дәрәҗәдә үткәрелә:

- татар телен башлангыч дәрәҗәдә белүчеләр өчен;

- татар телен урта дәрәҗәдә белүчеләр өчен;

- татар телен камил дәрәҗәдә белүчеләр өчен.

Диктантның трансляциясе «ТНВ-Татарстан», «ТНВ-Планета» телеканалларында, «Болгар радиосы»нда, балалар һәм яшьләр өчен «САФ» радиосында, шулай ук акциянең рәсми сайтында алып барыла. Моннан тыш, Россия Федерациясе субъектларында, чит илләрдә, Татарстан Республикасы районнарында һәм Казанның башка оешмаларында да мәйданчыклар булдырыла.

«Татарча диктант» акциясендә офлайн һәм онлайн формаларда катнашып була.

Офлайн катнашу форматы

Акциядә офлайн мәйданчыкларда катнашу өчен катнашучыга түбәндәгеләрне үтәргә кирәк:

- акциянең рәсми сайтына керергә;

- «Мәйданчыклар» бүлегендә яшәү урыны, төбәк яки ил буенча иң уңайлы мәйданчыкны сайларга;

- әгәр мәйданчык оештыручылары тарафыннан таләп ителсә, сайланган мәйданчыкта теркәлергә.

Акция көнендә катнашучы билгеләнгән вакытка сайланган мәйданчыкка килергә тиеш. Офлайн мәйданчыкларда диктант тексты махсус чакырылган диктор тарафыннан укыла. Биредә катнашучыларны диктант язу өчен махсус үрнәк-бланклар белән тәэмин итәчәкләр. Диктант язылып беткәннән соң, тутырылган бланклар тикшерү өчен офлайн мәйданчык оештыручылары тарафыннан җыеп алына.

Онлайн катнашу форматы

Катнашучы диктантны дистанцион рәвештә ике төрле яза ала: классик онлайн формат (эшне файл итеп йөкләп тапшыру) һәм интерактив онлайн формат (сайтта турыдан-туры язу).

Классик онлайн форматта катнашу өчен, катнашучыга түбәндәгеләрне үтәргә кирәк:

- акциянең рәсми сайтына керергә:

- диктант язу өчен бланкны йөкләргә һәм кәгазьгә чыгартырга;

- акция үткәрү көнендә Мәскәү вакыты белән 10:00 сәгатьтә «ТНВ-Татарстан», «ТНВ-Планета» телеканалларында, «Болгар радиосы»нда, балалар һәм үсмерләр өчен «САФ» радиосында яисә акциянең рәсми сайтында туры эфирны кабызырга;

- текстны тыңлап, аны бастырылган бланкка язарга;

- язып бетергәннән соң, бланкны сканерларга яки сыйфатлы итеп фотога төшерергә;

- эшнең электрон версиясен акциянең рәсми электрон почтасына - info@ftatar.org җибәрергә.

Интерактив онлайн форматта (сайт аша) катнашу өчен, катнашучыга түбәндәгеләрне үтәргә кирәк:

- акциянең рәсми сайтында – diktant.tatar катнашучы буларак теркәлергә;

- акция үткәрү көнендә Мәскәү вакыты белән 10:00 сәгатьтә сайттагы шәхси кабинетка керергә;

- «ТНВ-Татарстан», «ТНВ-Планета» телеканалларында, «Болгар радиосы»нда, балалар һәм үсмерләр өчен «САФ» радиосында яки акциянең рәсми сайтында диктант трансляциясен тыңларга һәм текстны махсус электрон формада язарга.

Акцияне оештыру һәм уздыру вакытында мәгълүмат белән тәэмин итү өчен рәсми сайт эшләп килә. Рәсми сайтта түбәндәге мәгълүмат бирелә: оештыручы буларак теркәлү, онлайн-катнашучы буларак теркәлү, уздыру тәртибе, PSD форматындагы афиша, диктант текстлары, тикшерү критерийлары, диктант язу нокталары картасы, сынап карау биремнәре, диктант язучыларның билгеләре, оештыручылар өчен рәхмәт хатлары; оештыручылар, партнерлар, элемтә буенча мәгълүмат.

Диктант нәтиҗәләре акция уздырылганнан соң 30 (утыз) көннән дә соңламый сайтка урнаштырыла. Аларны бланктагы код сүзе һәм исем-фамилия буенча белеп булачак.