Форма поиска
17 июль көнне Ташкичү авылында «Сөлгеле капка» V ачык фольклор фестивале узды.
Фестивальдә катнашучыларның саны елдан-ел арта. Быел чарада катнашучы коллективлар саны 100дән артты. Фестивальгә Татарстанның Арча, Аксубай, Апас, Алексеевск, Биектау, Балык Бистәсе, Балтач, Зәй, Казан, Кама Тамагы, Кукмара, Лаеш, Нурлат, Питрәч, Сарман, Тукай, Теләче, Югары Ослан, Яшел Үзән, Әтнә районарыннан, шулай ук Мари республикасы, Киров, Оренбург Самара өлкәләреннән башкаручылар чыгыш ясады. Алар «Халык җыры», «Халык биюе», «Инструменталь башкару», «Фольклор этнографик күренеш» номинацияләрендә иҗади номерларын тәкъдим итте.
Фестиваль кунакларны Ташкичү авылы Мәдәният йортында каршы алудан башланды. Шушы бәйрәмгә нигез салучы «Өммегөлсем» халык фольклор коллективы һәр кунакны җырлап сәламләде.
Бәйрәмгә килүчеләр традицион рәвештә фестиваль мәйданына җырлап, авыл урамнарына гармун моңы яңгыратып төштеләр.
Фестивальнең исеменнән үк күренгәнчә, аның нигезендә татар сөлгесе, аны зурлау ята. Фестивальдә сөлгеләрнең кулланылышын, аларның әһәмиятен күрсәтү максатыннан быел да сөлгеләр парады узды. Һәр коллектив үз якларына хас чигү алымнары белән эшләнгән сөлгеләр тотып мәйдан урады.
Фестиваль дуслык күпере дә төзи – бер мәйданда татар, рус, мари, керәшен башкаручылары чыгыш ясый.
Башка яңалыклар
