Режиссер Камил Саттаровны аның кызы Резедә Хөрмәтуллина белән искә алабыз

«Милли кунакханә»дә бераз гына моңсу да, шул ук вакытта кадерле дә чыгарылыш. Гомере буе халык иҗатын барлап, Туфан Миннуллин сүзләре белән әйткәндә, чын мәгънәсендә халык театрларының атасы булган, Татарстанның атказанган мәдәният хезмәткәре, Россиянең һәм Татарстан Республикасының Театр эшлеклеләре берлеге әгъзасы Камил Зиннәт улы Саттаровны искә алу тапшыруы бу. Исән булса, хөрмәтле режиссерыбызга 90 яшь тулган булыр иде.

Сәнгать дөньясына урау юллар аша килгән Камил Зиннәт улы, заманында Ленинградта СССР профсоюзлары Югары мәктәбенең театр бүлегенә режиссерлыкка укырга керә. Монда аңа Георгий Товстоногов, Кирилл Лавров, Алиса Фрейндлих, Татьяна Доронина кебек бөек режиссерлар, СССРның халык артистлары белем бирә.

Камил Саттаровның максаты – театр ярдәмендә ана телебезнең бөтен хиссиятен, нечкәлеген, миллилеген саклап калу, аларны яшь буынга җиткерү иде.

Камил Саттаров I Бөтенсоюз үзешчән сәнгать фестиваленең лауреаты була, алтын медаль белән бүләкләнә. Аның театр мәктәбен 500дән артык кеше узган. Алар арасында Татарстанның һәм Россиянең халык артисты Алсу Гайнуллина, Татарстанның халык артистлары Миңгол Галиев, Лидия Әхмәтова, Әсхәт Хисмәтов, Минзәлә Татар драма театры артисты Хафиз Хамматуллин, филология фәннәре докторлары Фәрит Бәширов һәм Рамил Исламов та бар. Хәй Вахит белән Аяз Гыйләҗевның Камил Саттаровны «Халык театрларының профессоры» дип атавы бик хак сүз дә, иң югары бәя дә!

Сезнең белән гаилә истәлекләрен бүлешергә без студиягә Камил абыйның кызын, педагогика фәннәре кандидаты, КФУ доценты Резедә Камил кызы Хөрмәтуллинаны чакырдык.

15 декабрь, 14.00 сәгатьтә «Милли кунакханә»гә рәхим итегез! Очрашуны безнең ВКонтакте челтәрендәге рәсми биттә карарга мөмкин.