«Милли кунакханә»дә «Изгеләр ашы» йола-күренешен тәкъдим итәбез

Билгеле булганча, һәр елның 17 июлендә Россиядә Бердәм фольклор көне билгеләп үтелә. Татарстанда әлеге көн уңаеннан 650дән артык чара уздырылды, шуларның иң мөһимнәренең берсе – «Милли мирас» конкурсы финалы булды.

Быелгы конкурска 50дән артык матди булмаган мәдәни мирас объекты тәкъдим ителде. Мәртәбәле жюри алар арасыннан 10 иң яхшы эшне аерып алып, нәкъ менә Бердәм фольклор көнендә яңадан карады. Финал Арча төбәгенең Ташкичү авылында узды. Һәр эшкә бәя тарихи кыйммәте, гореф-гадәт, йола буларак кулланышы һәм фәнни яктан исбатланган язмасына карап бирелде.

Әлеге бәйгедә беренче урынны Балык бистәсе төбәгенең Иске Арыш авыл Мәдәният йорты әзерләгән «Изгеләр ашы» йола-күренеше яулады.

Район Мәдәният йорты белгече Гөлназ Сәйфиеваның конкурска бирелгән эш өчен ихлас җан атып торуын да билгеләп үтәргә кирәк.

30 июль 14.00 сәгатьтә «Милли кунакханә» студиясендә әлеге тарихи йоланы саклап калучы фидакарь затлар белән якыннанрак танышырсыз.

«Милли кунакханә»дәге бу очрашуны безнең ВКонтакте челтәрендәге рәсми биттә карарга мөмкин.

Әлеге проект «Татарстан Республикасы мәдәниятен үстерү» Татарстан Республикасы дәүләт программасы кысаларында гамәлгә ашырыла.