«Әллүки» балалар студиясе спектакле белән Арчада «Хәрби батырлык һәм хезмәт фидакарьлеге елы» ачылды

2026 ел Татарстанда «Хәрби батырлык һәм хезмәт фидакарьлеге елы» дип игълан ителде. Арчада әлеге елны район Мәдәният йортының «Әллүки» балалар театр студиясе ачып җибәрде. Алар Туфан Миңнуллин әсәренә нигезләнеп «Иптәш командир» спектаклен күрсәттеләр.

Батырлык, хезмәт кебек төшенчәләргә кечкенәдән нигез салына. Әлеге елны нәкь менә яшь буын, балалар куйган спектакль ачуы аеруча да әһәмиятле. Яшь буынның илебез тарихын өйрәнүләре, ватанпәрвәрлек рухында тәрбияләнүләре һәм төрле елларада Ватаныбызны саклаган геройлар истәлеген саклавы бик мөһим. Батырларның бөек мирасын саклау, аларның кыюлыгын һәм хезмәтләрен өлге итеп алу, кыйммәтле тәҗрибәләренә таянып атлау — хәзерге буынның изге бурычы.

Спектакль карарга килүче тамашачылар «Әллүки» балалар театр студиясенең яшь артистларына һәм төркемнең җитәкчесе Ләйлә Мөхәммәтгалиевага рәхмәт әйтеп, киләчәктә аларга зур уңышлар теләде.