Казанда танылган татар җырчысы Илһам Шакировны искә алалар

Бүген мәшһүр җырчы, Россиянең һәм Татарстанның халык артисты, Г.Тукай исемендәге Дәүләт премиясе лауреаты Илһам Шакировның туган көне.

Ул 1935 елның 15 февралендә Сарман районы Яңа Бүләк авылында алты балалы гаиләдә төпчек бала булып дөньяга килә. 1954 елда Казанга килә, музыка училищесына укырга керә. 3 нче курстан аны, укытучылар таләбе буенча, консерваториягә, вокал бүлегенә кабул итәләр. 1960 елда ул җырчылык юнәлеше буенча Казан консерваториясен тәмамлый.

Илһам Шакиров сәләтле җырчы, баритон тавышка ия, халык җырларын, композиторлар әсәрләрен, классиканы бердәй оста башкаручы артист булып таныла. 1960 елдан башлап ул Г.Тукай исемендәге Татар дәүләт филармониясендә эшли, аңа 59 ел гомерен багышлый.

1970 елда Илһам Шакировка «Татар халык җырлары» дигән концерт программасы өчен Габдулла Тукай премиясе бирелә.

Җырчының туган көне уңаеннан Казанда бер кызыклы чара да узачак. 15 февраль көнне 18:30 сәгатьтә Г.Тукай исемендәге Татар дәүләт филармониясендә легендар җырчының туган көненә багышланган зур концерт узачак. Җырчыга багышланган концертларны Татар филармониясе 2002 елдан башлап ел саен уздыра.

Әлеге концертта Салават Фәтхетдинов, Фердинант Сәлахов, Әсхәт Хисмәтов, Рәсим Низамов, Филүс Каһиров, Асылъяр, Илгиз Мөхетдинов, Алинә Даутова, Алмас Хөсәенов, Зәринә Хәсәншина, Игорь Дмитриев, Азат Кәримов, Алинә Кәримова, Рафил Җәләлиев, Эльмира Гыйльфанова, Рөстәм Насыйбуллин, Сиринә Зәйнетдинова, Чулпан Йосыпова, Татьяна Ефремова катнашалар. Алар Илһам Шакиров репертуарыннан җырлар, татар халык җырлары, татар композиторлары әсәрләрен башкарачак.