Форма поиска
Казанның «18 санлы инглиз телен тирәнтен укыта торган урта гомумбелем бирү мәктәбенең» 4Г класс укучылары бүген шәһәр үзәгендәге Кабан күле яр буена җыелды. Биредә алар татар халкының борынгы «Боз озату» йоласын уздырды. Чараны мәктәп китапханәсе җитәкчесе Гөлнара Мукминова һәм класс җитәкчесе Венера Касаткина оештырды. Әлеге бәйрәм Татарстанда уза торган Милли мәдәниятләр һәм традицияләр елы кысаларында үткәрелде.
Чараны башлап, Гөлнара Мукминова «Боз озату» турында сөйләде. Аннары «Таткультресурсцентр» ДБУның Тикшеренүләр һәм традицион мәдәниятне саклау бүлеге башлыгы Рәмзия Гәйфетдинова әлеге йоланың башлангычы, аның тарихы һәм бүгенге көндә сакланып калуы турында сөйләде.
Шуннан соң балалар бәйрәмгә багышланган шигырьләр укыды, татар халык уеннары уйнады, «Боз озату» йоласына хас гадәтләр белән танышты, биеде. Аеруча аларга «Капкалы» һәм «Йөзек салыш» уеннары ошады. Ахырда укучылар махсус викторинада катнашып, әлеге йола турындагы сорауларга җавап бирде. Бәйрәм бик җанлы һәм күңелле узды.
Гөлнара Мукминова сүзләренә караганда, аларның мәктәпләрендә халык гореф-гадәтләрен һәм милли мәдәниятне саклауга зур игътибар бирелә. «Киләчәктә мин балалар белән Сөмбелә бәйрәмен дә уздырырга телим», - дип сөйләде ул.
Башка яңалыклар
23.11.2023
