«Идел-йорт – 2022» Төбәкара конкурсы башлана

Казанда «Идел-йорт – 2022» театр коллективларының Шамил Закиров исемендәге XXII Төбәкара конкурсы башлана.

Әлеге фестиваль-конкурста катнашкан коллективларның иң яхшы спектакльләре В.И. Ленин исемендәге Мәдәният сараенда узачак. Конкурсның лауреаты дип танылган 12 спектакль 7, 8, 9, 10, 16, 22 ноябрь көннәрендә 13.00 һәм 17.00 сәгатьтә күрсәтеләчәк. Тамашага «Пушкин картасы белән дә керергә мөмкин.

Әлеге конкурс-фестивальнең җиңүчеләрен бүләкләү тантанасы исә 19 декабрьдә Г.Камал театры бинасында узачак.

12 сентябрьдән 3 октябрьгә кадәр оештыручылар сайтында катнашу өчен гаризалар кабул ителә. Ә 4 октябрьдән 14енә кадәр конкурска килгән эшләрне карау, тикшерү һәм бәяләү булачак. Жюри финалга үтүчеләрне ачыклап, йомгаклау этабында кемнәр чыгыш ясавын билгели. Нәтиҗә ясалганнан соң, 6 җиңүче һәм бер Гран-при иясе булыр дип көтелә.

Татар мәдәни ресурс үзәге директоры Алсу Мифтахова ассызыклап үткәнчә: «Бүгенге көндә «Идел-йорт» фестивале гади конкурс кына түгел. Ел дәвамында республиканың үзешчән театр коллективлары белән тыгыз эш алып барылды. Иҗади һәм белем бирү юнәлешендәге лабораторияләр Татарстанның 11 профессиональ театры базасында барды. Биредә һәр районның сәнгать җитәкчеләре, режиссерлар, актерлар, концермейстерлар катнашты. Тамашачы бәясе һәр коллектив өчен кадерле, шуңа да без казанлылыр һәм башкала кунакларын әлеге спектакльләргә чакырабыз».

Жюри әгъзаларына килгәндә, мәртәбәле фестивальнең жюри рәисе, Яр чаллы татар дәүләт драма театрының сәнгать җитәкчесе Олег Кинҗәгулов, М.С. Щепкин исемендәге Югары театр училищесын тәмамлаган режиссер, доцент Наталья Табачкова, Татарстанның атказанган сәнгать эшлеклесе, Г. Камал театрының музей директоры Луара Шакирҗанова, шагыйрә, Г.Кариев исемендәге Казан дәүләт Яшь тамашачы театры директоры Луиза Шарова, балетмейстер Нурбәк Батулла, композитор Миләүшә Хәйруллина, Г.Камал театрының сәнгать бүлеге җитәкчесе Илназ Хәйбуллин.

Конкурс «Татар халкының милли үзенчәлекләрен саклау» программасын тормышка ашыру кысаларында үткәрелә. Бу, үз чиратында, милләтара элемтәләрне ныгыту һәм театраль традицияләрне саклау өчен кирәк. Конкурска дөнья классикасы да, хәзерге заман әсәрләре дә тәкъдим ителә.

1998 елдан алып «Идел-йорт» фестивале үзенә һәр ел саен Россия төбәкләреннән һәм республика районнарыннан театр коллективларын җыя. Конкурсның төп максаты – үзешчән театр сәнгатенең үсешенә теләктәшлек белдерү, актерларның, режиссерларның осталыгын арттыру.

Конкурсны гамәлгә куючылар - Татар мәдәни ресурс үзәге, Бөтендөнья татар конгрессы һәм Г.Камал театры.