Балтачта үзешчән сәнгать коллективлары арасында «Бию Фест» бию фестивале-конкурсы узды

2026 ел башында Балтачта район күләмендә хуҗалыкларның үзешчән сәнгать коллективлары арасында «Бию Фест» дип аталган бию фестивале-конкурсы игълан ителгән иде.

Нигезләмәдә күрсәтелгәнчә, сайлап алу турлары ике зонада: 24 март – Чутай һәм 27 март – Салавыч мәдәният йортларында узды. Биючеләрнең чыгышын мәртәбәле жюри: Казан дәүләт мәдәният институтының хореография сәнгате кафедрасы укытучысы Светлана Леонидовна Ярмакова, Татарстан Республикасының атказанган мәдәният хезмәткәре Эрик Геннадьевич Васинкин, Балтач Үзәкләштерелгән авыл клублары системасы балетмейстеры Рөстәм Мидхәт улы Хәсәнов бәяләде.

Әлеге турларда сайланып алынган иң яхшы коллективлар 10 апрель көнне Балтачта узган фестивальнең йомгаклау концертында чыгыш ясады.

Авылда яшәүчеләр, эшләүчеләр арасында бию сәнгатенә зур кызыксыну уятып, бигрәк тә авылдагы эшче яшьләрне бергә туплап, зур сәхнәгә чыгару, талантларын күрсәтү һәм аларга карата игътибар арта баруы куанычлы күренеш, ди оештыручылар. Бу хакта чарада катнашучылар саны да сөйли. Фестиваль барлык авыл җирлекләрен колачлаган һәм 40тан артык коллектив, 200гә якын биючене җәлеп иткән. Алар эчтәлекле, кызыклы чыгышлар аша районыбызның күпмилләтле халкының гореф-гадәтләрен тәкьдим иткән.

Зур, күләмле фестивальне оештыручылар: район Башкарма комитеты җитәкчелеге, мәдәният бүлеге, җирлекләрдәге мәдәният йортлары коллективлары, авыл җирлеге башлыклары. Оештыручылар фестивальгә матди яктан тәэмин иткән авыл хуҗалыгы җитәкчеләренә, идәннәрдән ут чыгарган биючеләргә рәхмәтен җиткерә!