Балтачта «Тамырлардан гасырларга яшәү җыры чыңласын» дигән чара үтте

2025 ел – махсус хәрби операциядә катнашучылар хөрмәтенә һәм бабаларыбызның батырлыгы истәлегенә Ватанны саклаучылар елы булып, ел дәвамында үткән чаралар илебезнең бәйсезлеген, иминлеген саклаган һәм яклауны дәвам иткән кешеләргә тирән рәхмәт белдерү шигаре астында узды.

12 декабрь көнне район Мәдәният үзәгендә Россия Конституциясе, Геройлар һәм волонтерлар көннәре кебек истәлекле бәйрәм даталарын үз эченә алган «Тамырлардан гасырларга яшәү җыры чыңласын» дип исемләнгән чара узды. Ватанны саклаучылар елын ябу чарасы барышында районның 95 еллык тарихи үсешендә үзләреннән лаеклы өлеш кертүчеләр, Ватан сакчылары, волонтерлар, хезмәт геройлары хөрмәтләнде. Бүгенге көндә йөзәрләгән райондашыбызның күкрәгендә хезмәттәге казанышлары өчен төрле елларда бирелгән орден, медальләр балкый. Ирексездән күңелләрдә горурлык хисләре уяна. Аларның һәркайсының үткән юлы , башкарган хезмәте үзенә күрә мактауга, ихтирамга лаек.

Данлы, гыйбрәтле тарихыбыз бар, горурланырлык бай әдәби, мәдәни мирасыбыз бар, исемнәре райондашларыбыз хәтерендә алтын хәрефләр белән язылырга тиешле Герой улларыбыз, хезмәт батырларыбыз бар. Белик, онытмыйк һәм оныттырмыйк!

Һәр буын ил тарихына үз битләрен яза, үзенең эш-гамәлләре белән кереп кала. Балтачыбызның олы тарихы һәр авыл һәм һәр хезмәт коллективының кечкенә тарихыннан тупланган. Тарих төпкеленнән килгән фидакарьлек, туган төбәкне ярату хисе киләчәктә дә хич сүрелмәс.

Республикабызның төньягында, иң матур җирендә урнашкан җырлы-моңлы Балтач үзенең 100 еллык һәм аннан соң булачак юбилейларын да матур уңышлар белән каршылар дигән изге өметтә калабыз.