Балтачта Гаилә елын йомгаклап, Ватанны саклаучылар елын ачып җибәрделәр

Балтач район Мәдәният үзәгендә узган Гаилә елына йомгак ясап, Ватанны саклаучылар елына старт бирелде.

Һәр үткән ел тарих битләренә илкүләм әһәмиятле вакыйгалары белән кереп кала, халык хәтерендә саклана. Узып киткән 2024 ел республикабызда – Фән елы, ә Россия күләмендә – Гаилә елы, аның кыйммәтләрен саклауга юнәлдерелгән ел булды.

Биш хәрефтән генә торган «гаилә» сүзе бик зур мәгънәгә ия. Ел дәвамында районда уздырылган төрле чаралар аша Балтач районының күркәм, үрнәк гаиләләре белән таныштыру барды. Алар ирешкән уңышларга чын күңелдән сөенеп, горурлык хисләре кичерде балтачлылар. Чөнки халык фикеренчә, «Гаилә бәхете – ил бәхете».

Күпмилләтле дәүләтебезнең нигезе, һәр кешенең таянычы һәм терәге булган Гаилә елын озатып, 2025 ел – «Ватанны саклаучылар елы»на аяк бастык. Бөек Җиңүнең 80 еллыгын билгеләп үтү кысаларында һәм илебез алдында торган бурычларның әһәмиятен исәпкә алып игълан ителгән бу ел, безгә буыннар бәйләнешен тирәнтен тоярга, киләчәккә ышаныч белән карарга ярдәм итәчәк.

8 февраль көнне Балтач район Мәдәният үзәгендә узган чарада Балтач муниципаль районы башлыгы Рамил Нотфуллин, шулай ук Россия Герое Рәсим Баксиков та катнашты.

Ватан каһарманнары, шул исәптән махсус хәрби операциядә катнашучылар һәм хезмәт батырлары турында хәтерне мәңгеләштерү эшен дәвам иттерү максатын куя Ватанны саклаучылар елы.