Балтачлылар Курган өлкәсенең Шадринск шәһәрендә Сабантуй бәйрәмен гөрләтеп кайтты

Шимбә көнне, 14 июньдә, Курган өлкәсенең борынгы сәүдәгәрләр шәһәре булган Шадринскта татар һәм башкорт милли мәдәниятенең Сабантуй бәйрәме гөрләп узды. Балтачлыларга да әлеге бәйрәмнең төп кунаклары булырга насыйп булды.

Сабантуй ул – халыклар бердәмлеге, халыклар дуслыгы бәйрәме. Иң тырыш хезмәтчәннәрен, иң көчле, җитез спортчыларны, талантлы җырчылар-биючеләрне, үзешчән халык артистларын, күңелләренә шифа эзләүче тамашачыларны төп мәйданга җыя торган күркәм милли бәйрәм.

Балтач районы чараны эчтәлекле, матур концерт программасы, декоратив-гамәли сәнгать буенча мастер-класслар, агачтан эшләнгән чын татар капкасы белән үрелгән читәннәр һәм кул эшләнмәләреннән бизәлгән татар өе мөһите белән бизәде. Милли костюмнардан киенгән егет-кызлар исә бәйрәмгә килгән кунакларны кабат мәртәбә рухландырды. Татар халкы тарафыннан буыннан-буынга сак кына тапшырыла торган борынгы йолаларга һәм гореф-гадәтләргә аерым игътибар бирелде.

Сабантуй – гореф-гадәтләрне саклау бәйрәме генә түгел, ә күпмилләтле Шадринск шәһәренең барлык халыкларын берләштерүче дуслык символы да булды.