Форма поиска
27 февраль көнне Балтач Мәдәният үзәгендә мәдәният хезмәткәрләрең чираттагы эшлекле семинары үтте. Семинарга килүче кунакларны чәй табыны белән сыйлап, эшлекле очрашу тамаша залында дәвам итте. Семинарның төп темасы «Үзешчән уен кораллары ансамблендә эшне оештыру».Үзәкләштерелгән авыл клублары челтәре директоры Илфат Гыйлманов кунакларны сәламләде, ә авыл клублары методисты Карина Тимербаева эш барышы белән таныштырды. Программа кызыклы, файдалы чыгышлар белән үрелеп барды. Мәсәлән, Арбор авыл Мәдәният йортының директоры, атказанган мәдәният хезмәткәре Марат Габделхаков думбыра, сорнай һәм дәф уен кораллары, Карадуган авыл Мәдәният йорты директоры Гөлкәй Хәйруллина – курай, Карадуган авыл Мәдәният йорты сәнгать җитәкчесе Равил Гарифҗанов – кубыз; Субаш авыл Мәдәният йорты директоры, атказанган мәдәният хезмәткәре Хәлил Фәезов – хромка, гармун, баян, Балтач Мәдәният үзәгең түгәрәк җитәкчесе Энҗе Шагиева – агач кашыкларда уйнау элементлары, «Балкыш» халык җыр һәм бию ансамбленең хормейстеры Айсылу Асадуллина һәм ансамбльнең концертмейстеры Раил Тимербаев вокаль-инструменталь ансамбльдә уйнау серләре белән бүлеште.
Чыгыш ахырында Мәдәният үзәгендә эшләүче Римма Фәссахова һәм Айсылу Асадуллина чарада катнашучыларга үзләренең матур җырларын бүләк итте.
Очрашу нәтиҗәле һәм бик җылы узды. Ул катнашучыларга тәҗрибә уртаклашырга гына түгел, ә актуаль мәсьәләләр буенча фикер алышырга да мөмкинлек бирде, аларга үз эшләрендә куллана алырлык яңа белемнәр һәм идеяләр ачты. Кунаклар семинар эшләнлегенә зур бәя бирде.
Башка яңалыклар
