Форма поиска
Татарстанда тагын бер яңартылган авыл Мәдәният йорты эшли башлады. 8 сентябрь көнне Апас районы Коштавылы мәдәният йорты үзенең ишекләрен ачты.
Төзекләндерү эшләре 2026 елның апрель аенда башланып киткән иде. Бина «Авыл клубларын төзекләндерү» республика программасы нигезендә яңартылды. Котшавылы Мәдәният йорты 1987 елда төзелгән, 2010 елда төзекләндерү эшләре башкарылган. Шуннан бирле яңартулар булмаган.
Мәдәният йортын ачу тантанасында Россия Дәүләт Думасының Икътисади сәясәт комитеты рәисе Максим Топилин, Татарстан Республикасы мәдәният министры урынбасары Ленар Хәкимҗанов, район башлыгы Айрат Җиһаншин, «Апас» якташлар җәмгыяте вәкилләре катнашты.
- Коштавылында бүген бәйрәм – матур бина ачылды. Киләчәктә биредә бергә җыелышып бәйрәмнәр үткәрергә, тарихи вакыйгаларны билгеләп үтәргә, яшь буынны тәрбияләргә язсын, – диде район башлыгы Айрат Җиһаншин.
Бина үз эченә китапханәне дә алган. Биредә авыл тарихын мәңгеләштерүче музей почмагы да булдырылган. Фойега бильярд һәм теннис өстәле куелган, яңа аппаратура, җиһазлар белән тәэмин ителгән. Якты, җылы, нурлы, чиста-пөхтә бинада эшләр өчен дә, ял итәр, күңел ачар өчен дә барлык мөмкинлекләр бар.
Россия Дәүләт Думасының Икътисади сәясәт комитеты рәисе Максим Топилин милли проектлар һәм алар нигезендә башкарылган эшләр хакында сөйләп узды, Коштавылы халкының шатлыгын бүлеште.
- Россиядә сәламәтлек саклау, мәгариф, мәдәният, торак-коммуналь хуҗалыгы һәм башка өлкәләр игътибар үзәгендә. Зур шәһәрләр белән беррәттән кечкенә авыллар да яңара, төзекләнә, биналар калка. Мәдәният йортыгыз сезгә озак хезмәт итсен, – диде ул.
Татарстан Республикасы мәдәният министры урынбасары Ленар Хәкимҗанов Апас районының мәдәният йортларын, клубларны төзекләндерү буенча алдынгылар рәтендә булуын әйтте.
- Агымдагы елда гына да Татарстан Республикасында 22 бина төзелде һәм төзекләндерелде. Федераль һәм республика программалары нигезендә төзекләнгән биналар арасында сезнең мәдәният учаклары да булу – зур шатлык. Хәзерге вакытта районда Туган якны өйрәнү музее төзекләндерелә. Без Апас районына шатланып киләбез, сезнең уңышларны күреп сөенәбез, бирегә килгән саен яңалык күрәбез. Яңа юллар салына, биналар калка, эш урыннары булдырыла. Бу бик шатлыклы күренеш, – диде Ленар Хәкимҗанов.
Җитәкчеләр мәдәният өлкәсендә озак еллар нәтиҗәле эшләүче хезмәткәрләрне дә хөрмәтләде. Әлмәндәр авылы Мәдәният йорты мөдире Лилия Камалиева, Коштавылы Мәдәният йорты мөдире Тәскирә Хафизова «Мәдәнияттә казанышлары өчен» күкрәк билгесенә лаек булды. Төбәк Черкене Мәдәният йорты мөдире Любовь Антоновага Татарстан Республикасы Мәдәният министрлыгының Мактау грамотасы тапшырылды.
Башка яңалыклар
