Форма поиска
Ел саен 21 мартта Бөтендөнья шигърият көне билгеләп үтелә. Ул 1999 елда Парижда узган ЮНЕСКО Генераль ассамблеясенең XXX сессиясендә оештырылган.
Бөтендөнья шигърият көненең максаты – шигырьләр аша тел төрлелеген саклау һәм юкка чыгу куркынычы астында булган телләргә дөньяга ишетелергә мөмкинлек бирү.
Бөтендөнья шигърият көне шагыйрьләрне хөрмәтләү, сөйләм традицияләрен тергезү, шигырь уку, язу һәм укытуга кызыксынуны арттыру, аның театр, бию, музыка һәм рәсем сәнгате кебек башка сәнгать төрләренә якынаюына ярдәм итү өчен менә дигән сәбәп.
Шигърият көне уңаеннан без сезнең игътибарга шигъри күчтәнәч – Гөлүсә Батталованың «Шигырь эзлим» шигырен тәкъдим итәбез. Бәйрәм белән!
ШИГЫРЬ ЭЗЛИМ...
Шигырь эзлим
табигатьтән,
искән җилдән,
аккан судан…
Бушанырга сәбәп эзлим,
Күңел чөнки шыплап тулган.
Кичерешләр чиктән ашкан,
нык җыелган,
тормыш баскан…
Гаеп ташлап карамагыз,
Язгы судай ургып ташсам.
Сәбәп эзлим,
сәгать эзлим,
Вакыт җитте, шуны тоям.
Тамчы-тамчы илһам җыям,
күтәреләм… җиргә коям.
Җир яшәрсен, күңелләрдә
Чәчкә атсын сулган гөлләр.
Шигырь бүген
һәр тереклек,
йөгерек су,
искән җилләр…
Хис-тойгылар, кичерешләр,
Барысы җыр – шуны тоям.
Сулган җаннар арулансын,
Тамчы-тамчы илһам җыям…
Сибелермен ләйсән булып –
Мөлдер-мөлдер күңел оям.
Шигырь эзлим,
илһам җыям…
Башка яңалыклар
23.10.2025
