«Уен фест. Аҗаган» V төбәкара фестиваль-конкурсының Гран-при бүләген Теләче районының «Чулпан» командасы алды

7 сентябрьдә Казанның «Елмай» балалар паркында «Уен фест. Аҗаган» V төбәкара фестиваль-конкурсының финалы узды. Фестиваль Татарстан Республикасы Мәдәният министрлыгы ярдәмендә уза. Әлеге фестиваль – халкыбызның мәдәни мирасын, гореф-гадәтләрен саклап калып, яшь буынга тапшыруыбызның күркәм үрнәге.

Быелгы фестиваль-конкурсның сайлап алу турларында республиканың төрле районнарыннан дистәләгән балалар һәм яшьләр командалары катнашты. Финалга шуларның иң көчлеләре чыкты. «Елмай» паркында үткән бәйрәмдә алар борынгы халык уеннарында көч сынашты.

«Уен фест – 2025» фестиваль-конкурсының Гран-при бүләген Теләче районының «Чулпан» командасы алды. Шулай ук җиңүчеләр арасында Әтнә районының «Балкыш», Бөгелмә районының «Прогресс», Зәй районының «Кудесники книг», Ютазы районының «Рябинушка» командалары, Биектау районының «Фирүзә» җыр һәм бию ансамбле, Чүпрәле районының «Таң» җыр һәм бию халык ансамбле, Яшел Үзәннең «Алтын» җыр һәм бию халык ансамбле бар.