Форма поиска
24 август көнне Казан мэриясе бинасы балконнарында «Казан тавышлары» дип аталган театральләштерелгән перформанс үтәчәк. Бер кичкә шәһәр администрациясе балконнары театр сәхнәсенә әвереләчәк.
Чара Казан шәһәре, Кремль урамы, 3 йорт адресы буенча узачак. Ул 20.30 сәгатьтә башлана. Мэрия балконнарыннан Казан театрларының әйдәп баручы артистлары рус һәм татар телендә шигырьләр укыячак, музыкантлар һәм җырчылар башкаруында музыкаль әсәрләр яңгыраячак.
Кичке перфоманс Татарстанның халык артисты Рөстәм Абязов җитәкчелегендәге «La Primavera» Казан камера оркестры чыгышыннан башланып китәчәк. Чарада Татарстанның халык артистлары Искәндәр Хәйруллин, Илья Славутский, Елена Ряшина, Зөлфия Вәлиева, Татарстанның атказанган артистлары Рамил Вәҗиев, Искәндәр Нуриҗанов, Илнур Закиров, Камал театры артистлары Ләйсән Фәйзуллина, Ришат Әхмәдуллин, Качалов театры артистлары Анна Макарова, Регина Габбазова, Тинчурин театры актерлары Артем Пискунов, Резеда Сәләхова һәм Кариев театры артисты Булат Гатауллин катнаша.
Шулай ук балконнардан Татарстанның халык артисты Эльмира Кәлимуллина, Татарстанның атказанган артистлары Илүсә Хуҗина, Артур Исламов, Эльза Заяри, Анастасия Макарова, Динә Закирова һәм таланталы башкаручылар Матвей Козин, Михаил Урецкий, Илгиз Мөхетдинов, Алмас Хөсәенов, Гөлназ Закирова һәм «Дорога Звезд» шоу-хоры чыгыш ясаячак.
«Казан тавышлары» театральләштерелгән перформансы Казан мэриясе тарафыннан 2021 елдан бирле үткәрелеп килә.
Башка яңалыклар
14.04.2025
