Казан Кирмәнендә халык уеннары гөрләде

1 июнь көнне Казан Кирмәненең Пушечный двор мәйданчыгы иртәдән кичкә кадәр балалар тавышыннан гөрләп торды. Биредә II төбәкара «UenFest»Татарстан халыклары традицион уеннары фестиваленең йомгаклау чарасы узды.

Чарага Татарстанның 11 районыннан балалар коллективлары җыелган иде. Алар барысы да «UenFest» фестиваленең финалына чыккан төркемнәр.

Фестиваль финалистлары чарада үзләренең осталыкларын күрсәтте. Жюри һәм күпсанлы тамашачылар игътибарына балалар халык уеннарын тәкъдим итте. Яшүсмерләр һәм балалар төрле милләт киемнәрендә җырлады, биеде, үз төбәкләрендә элек киң таралган халык уеннарын уйнады. Тамашачылар да карап кына утырмады, төрле милләтләрнең кызыклы уеннарында бик актив катнашты.

Аннары фестивальдә катнашучы балалар оештыручылар тарафыннан әзерләнгән төрле бәйгеләрдә катнашты, биремнәрне чиште, иҗади конкурсларда ярышты.

Ахырда мәртәбәле жюри җиңүчене сайлады. Быел җиңүгә Кукмара районының Яңа Каенсар авылы Мәдәният йорты каршында эшләп килүче «Инвожо» удмурт коллективы лаек дип табылды (коллективның җитәкчесе – Татарстанның атказанган мәдәният хезмәткәре Геннадий Әхмәтов). Балаларга Сочиның танылган «Сочи парк» аттракционнар паркына юллама тапшырылды.