Форма поиска
18 февраль көнне Апас районында Ватан Сакчысы елын ачу тантанасы узды. Әлеге чарада район башлыгы Айрат Җиһаншин, Татарстан Республикасы Дәүләт Советы депутаты Фәнил Баһаветдинов, район хәрби комиссары Наил Җантемиров катнашты. Шулай ук Татарстан Республикасы Мәдәният министрлыгы «Татар мәдәни ресурс үзәге»нең фәнни-нәшрият бүлеге мөдире Гөлназ Гыйльфанова, сынлы сәнгать һәм декоратив-гамәли сәнгать секторы мөдире Люция Низамиева, «Апас» якташлар җәмгыяте әгъзасы Рафис Гаптелганиев та тарихи чараның шаһиты булды. Залда исә тыл хезмәтчәннәре, махсус хәрби операциядә катнашучыларның гаиләләре, якыннары, хәрби хәрәкәт ветераннары, җәмәгать оешмасы җитәкчеләре урын алды.
Район мәдәният йорты фойесында Бөек Ватан сугышы еллары вакыйгаларын чагылдырган күргәзмәләр, экспозицияләр эшләде.
Тантаналы чараны район башлыгы Айрат Җиһаншин ачып җибәрде. Кунакларга мөрәҗәгать итеп ул: «Безнең районыбыз геройлары белән дан тота. Без Бөек Ватан сугышы елларында илебезне саклаучылар белән горурланабыз. Аларның батырлыгы киләчәк буын өчен нигез булып тора. Шулай ук махсус хәрби операциядә катнашучы егетләргә рәхмәт, хөрмәт сүзләрен җиткерәбез. Тыныч киләчәк өчен гомерләрен биргән халкыбызның батырлыгы, истәлеге безнең йөрәкләрдә мәңге сакланыр», – диде.
Аннары район башлыгы Айрат Җиһаншин һәм Татарстан Республикасы Дәүләт Советы депутаты Фәнил Баһаветдинов тыл хезмәтчәннәренә «1941-1945 еллардагы Бөек Ватан сугышында Җиңүгә 80 ел» юбилей медальләрен тапшырдылар. Алар өлкәннәргә чиксез ихтирам һәм рәхмәтләрен җиткерделәр.
Мәдәният хезмәткәрләре исә Ватан Сакчысы елын ачу уңаеннан сугыш елларының ачылыгын чагылдырган тамаша әзерләгән иде. Язмышларга үтеп кереп, барлык хыялларны чәлпәрәмә китергән, балачак бәхетеннән мәхрүм иткән, яшьлекләрен урлаган, хатыннарны тол калдырган, әниләрне елаткан елларны залда утыручылар күз яшьләре аша карады.
Башка яңалыклар
