Зур Сәрдек авылында Сабан туена яшь киленнәрнең чиккән сөлгеләрен җыйдылар

Татарның иң олы, затлы, гасырлар аша югалмыйча, милләт йөзе булып килгән Сабан туйлары якынлаша.

Республикабыз авылларында аңа әзерлек күптән башланды инде. «Әрәпә», «Ат аягын кыздыру», «Бирнә җыю», «Бүләк җыю», «Яулык жыю», «Сөрән салу» дип аталучы чараларның кыйммәте – халкыбызның гореф-гадәтләрен югалтмыйча саклап калудадыр, мөгаен.

Кукмара төбәге Зур Сәрдек мәдәният йорты директоры Нурфия Вәгыйз кызы Фәттахова үзләрендә үткән әлеге күңелле чара турында безгә дә сөйләде.

«Яшь киленнең халык алдына чыгарган иң затлы бүләге – Сабан туена чиккән сөлгесе. Безнең Зур Сәрдек авылында яшь киленнәрнең Сабан туена сөлге чигеп бүләк итү йоласы әле дә яши. Һәр Сабан туенда 7-10лап сөлге җыела. Бу инде авылда ел саен дистәгә якын яңа гаилә корылуын да аңлата. Аннары, иң матур сөлгене билгеләү гадәте дә бар. Зур Сәрдек кызлары шуңа да әби-әниләренең чигү осталыгын үзләштереп калырга тырыша. Килен сөлгеләре белән мәйдан батырларын һәм ярышта иң ахырдан килгән атны бүләклибез. Сабан туе күрке – ат булса, чиккән сөлгеләр – бәйрәмнең иң матур бизәге», - дип саный Нурфия Фәттахова.