Форма поиска
20 гыйнварда КәримТинчурин исемендәге Татар дәүләт драма һәм комедия театры фойесында танылган фольклорчы, галим, драматург Нәкый Исәнбәтнең тормыш юлы һәм иҗатына багышланган китапны тәкъдим итү чарасы узачак. Кичә 10:00 сәгатьтә башлана. «Син сазыңны уйнадың» чарасы «Идегәй» татар халык дастаны буенча куелган спектакльгә багышлана.
Күренекле галим, Татарстанның халык язучысы, «Идегәй» дастанын беренче булып бастырып чыгаручы Нәкый Исәнбәткә багышланган китап «Җыен» фонды тарафыннан нәшер ителгән. Китапны тәкъдим итүдә язучылар, галимнәр, театр белгечләре, артистлар һәм К.Тинчурин театры актерлары катнашачак. Китапны басмага филология фәннәре кандидаты Миләүшә Хәбетдинова әзерләгән. Чараны К.Тинчурин театры Татарстанның Мәдәният министрлыгы, «Җыен» фонды, Татарстан Язучылар берлеге һәм КФУның Г.Тукай исемендәге Милли мәдәният һәм мәгариф югары мәктәбе белән берлектә оештыра.
Нәкый Исәнбәткә багышланган китапны тәкъдим итү барышында әдипнең әсәрләреннән өзекләр уйналачак, аның шигырьләре һәм җырлары яңгыраячак. Чарада Казан театр училищесы студентлары, халыкара конкурслар лауреаты, Н.Җиһанов исемендәге Казан консерваториясе укытучысы Сөмбел Кыямова чыгыш ясаячак. Бәйрәмне Тинчурин театры актрисасы Резедә Сәләхова алып бара. Чара барышында театрның Ильяс Камал җитәкчелегендәге камера оркестры чыгышын да ишетеп булачак.
Тинчурин театрының баш режиссеры Туфан Имаметдинов тарафыннан куелган «Идегәй» спектакле премьерасы 26-27 гыйнварда узачак. Туфан Имаметдинов «Идегәйне» сәхнәгә куярга алынуын әсәрнең милли, әдәби, тарихи актуальлеге белән аңлата.
«Идегәй» спектакле премьерасы уңаеннан Тинчурин театры музее җитәкчесе, Татарстанның атказанган мәдәният хезмәткәре Розалия Чабатова дастанга һәм «Идегәй» әсәрен беренче булып бастырып чыгаручы әдип, Татарстанның халык язучысы Нәкый Исәнбәткә, аның К.Тинчурин театры белән хезмәттәшлегенә багышланган күргәзмә әзерли.
Башка яңалыклар
