Форма поиска
7-9 ноябрь көннәрендә Татарстан Республикасында Казахстан Республикасы Абай өлкәсенең мәдәният көннәре узачак. Әлеге чара кысаларында Казанда күпсанлы кызыклы чаралар оештырыла.
Бу көннәрдә Казан Кремлендә Казахстанның Абай дәүләт тарихи-мәдәни һәм әдәби-мемориаль музей-тыюлыгы фондларыннан җыелган экспонатлар күргәзмәсе эшлиячәк. Анда Абай өлкәсеннән чыккан танылган шәхесләр Абай Көнәнбайлы, Шакарим Ходайбердыулы, Мухтар Ауэзов һәм башкаларның шәхси әйберләре, кулъязмалары, китаплары тәкъдим ителәчәк. Күргәзмә 7 ноябрь көндезге сәгать 12дә ачыла.
7-9 ноябрьдә Казанның Габдулла Тукай әдәби музеенда Семей шәһәре Абай исемендәге өлкә универсаль китапханәсе «Китап шедеврлары – кыйммәтле мирас» дип аталган экспозицион күргәзмәне тәкъдим итәчәк. Анда Абай исемендәге китапханәнең сирәк фондыннан китаплар белән танышу мөмкинлеге тудырылачак. Экспозиция ике бүлектән торачак: «Гасырлар авазы белән яңгыраган рухи мирас» һәм «Казанда басылып чыккан китап раритетлары».
Китап экспозициясе белән танышу Семей шәһәре тарихы, мәдәнияте, истәлекле урыннары һәм Алаш хәрәкәте тарихы белән башланып китәчәк. Барлык мәгълүмат визуаль форматта слайдлар ярдәмендә тәкъдим ителәчәк.
Казахстан Республикасы Абай өлкәсенең мәдәният көннәре кысаларында 9 ноябрьдә Казанның С. Саид-Галиев исемендәге Мәдәният сараенда Абай өлкәсе хакимияте эстрада-симфоник оркестрының концерт программасы да узачак. Оркестрның дирижеры – «Фидакарь хезмәт өчен» медале иясе Кенжегүл Акшекина.
Чараның максаты – Казахстан белән Татарстан арасында дуслык мөнәсәбәтләрен ныгыту, казах халкының мәдәниятен, сәнгатен һәм традицияләрен таныту. Концертта казах һәм татар музыкасы яңгыраячак. Программа казах, рус һәм татар телләрендә алып барылачак, бу төрле мәдәниятләр арасындагы бәйләнешләрне көчәйтүгә ярдәм итәчәк, ди оештыручылар.
Әлеге тамашада казах һәм татар халык җырларын, шулай ук танылган эстрада әсәрләре тәкъдим ителәчәк. Чара музыкаль мирасны саклап калу һәм популярлаштыру максатын куя.
Башка яңалыклар
