Форма поиска
Казанда «Нәүрүз» Халыкара театр фестивале ачылды. Быел ул инде уналтынчы мәртәбә уза. Фестиваль 5-11 июнь көннәрендә үтәчәк.
«Нәүрүз» - беренче чиратта, артистларның бер-берсе белән, тамашачылар һәм тәнкыйтьчеләр белән аралашуы ул. Бу Казан халкы өчен дә, башкалабызга килгән меңләгән туристлар өчен дә илебез халыклары һәм төбәкләр мәдәнияте белән танышу мөмкинлеге. Мәдәният - ул Россия төбәкләрен, шулай ук күршеләребез - БДБ илләре белән ике араны бәйләп торучы мөһим чылбыр», - дип саный Татарстан мәдәният министры урынбасары Дамир Натфуллин
Быел фестивальнең юбилей елы. «Нәүрүз»гә нәкъ 25 ел элек Казанда, Татарстанда нигез салынды. Фестиваль ел саен нинди дә булса халыклар мәдәниятенә, аерым республикага багышлана. Бу юлы «Нәүрүз» Төньяк Кавказ халыклары мәдәниятенә мөрәҗәгать итте.
«Дагыстан, Чечня Республикасы, Кабарда-Балкар республикасыннан шактый театрлар безнең идеяны хуплап алды. Һәр фестивальгә без гадәттә хедлайнер чакырабыз. Быелгы хедлайнер - Драма сәнгате мәктәбе һәм Мәскәүнең «Et Cetera» театры. Шушы еллар эчендә безгә бик күп театрлар килде. Фестиваль Россиянең театр картасында зур әһәмияткә ия», - дип саный Г.Камал исемендәге Татар дәүләт академия театрының баш режиссеры, «Нәүрүз» фестиваленең сәнгать җитәкчесе Фәрит Бикчәнтәев.
Драма сәнгате мәктәбе «Нәүрүз»гә инде икенче мәртәбә килә. Узган фестивальдә театр Драма сәнгате мәктәбенә нигез салучы Анатолий Васильевның легендар «Пушкинский утренник» спектаклен тәкъдим итсә, быел Игорь Яцко куелышында «Вишневый сад»ны алып килгән.
Фәрит Бикчәнтәев сүзләренчә, фестивальдә спектакльләрдән тыш, «Нәүрүз» фестивале йогынтысында барлыкка килгән Россия милли театрлары ассоциациясенең түгәрәк өстәле дә булачак. Чара 9 июньдә 9.00 сәгатьтә «Шәрык клубы» интерактив мультимедия комплексында узачак. «Без милли театр вәкилләрен бер-берсе белән аралаштыру өчен җыябыз. Ассоциация театрларга белем бирү программаларында ярдәм итә ала», - ди Фәрит Бикчәнтәев.
Башка яңалыклар
