Форма поиска
Чирмешәннең район Мәдәният йортында Беренче ачык район «Чирмешән ЭтноГүзәле-2021» матурлык һәм нәзакәтлелек бәйгесе үзды. Анда 15 гүзәл зат көч сынашты, дип хәбәр итә «Безнең Чирмешән» газетасы. Бәйгедә татар, чуваш, мордва, рус милләтләре вәкилләре катнашты. Кызларның иң яшенә - 14, иң өлкәненә 28 яшь иде.
Бәйгенең беренче турында катнашучылар үзләре белән таныштырды. Икенче биремдә кызлар жюри әгъзаларына үз халыкларының милли ризыкларын тәкъдим итте. Монда тутырма, урама, хуплу, бавырсак, шыртан, коймак, хуран кукли, авыл ипиеннән авыз итеп булды. Өченче турда исә кызлар милли туй киемнәрен күрсәтте. Катнашучыларның иҗади осталыклары белән тамашачы бәйгенең соңгы турында таныша алды – кызлар музыкаль өй эше биремнәрен тәкъдим итте.
- Районыбызда «Чирмешән гүзәле» чарасы күп еллар дәвамында үткәрелеп килсә, «ЭтноГүзәл» бәйгесен оештыру идеясе быел Туган тел һәм халыклар бердәмлеге елына бәйле туды. Кызлар алдында, беренче чиратта, үз милләтләренең традицияләрен, гореф-гадәтләрен күрсәтү бурычы куелган иде. Бу бәйгедә милли гүзәллеккә өстенлек бирелде, - ди чараны оештыручыларның берсе Альмир Жораев
Бәйге нәтиҗәләре буенча җиңүче булып Сосновка авылы кызы Анна Иванова табылды. Кара Чишмәдән Рәдилә Халикова һәм Яңа Элмәледән Арина Ухливанова – I һәм II вице-этногүзәлләр. Илүзә Шәяхмәтова, Асылъяр Газимова һәм Сильвия Еферова «Халык традицияләрен саклау өчен» махсус бүләккә ия булды. Алсу Минхәерова, Ксения Агеева, Валерия Миронова, Эльвина Әфләтунова, Илүсә Моратова, Алина Куркина, Диана Посадская, Вера Дәүләтшина һәм Валентина Аряшева исә бәйгедә актив катнашкан өчен бүләкләнделәр.
Әлеге чара «Пушкин картасы» федераль программасы кысаларында үткәрелде. «Чирмешән ЭтноГүзәле» бәйгесе киләчәктә дә уздырылачак, дип белдерде оештыручылар.
Башка яңалыклар
