Апас халык театры Түбән Новгород өлкәсенең Дзержинск шәһәрендә спектакль тәкъдим итте

Апрель башында Апас халык театры янәдән Түбән Новгород өлкәсенең Дзержинск шәһәрендә булып кайтты. 6 апрель көнне үзешчән артистлар анда Бөек Җиңүнең 80 еллыгына багышланган «Саф күңелгә тап төшми» спектаклен тәкъдим итте. Тамаша Дзержинск шәһәренең Химиклар Мәдәният сараенда узды.

Тамашачылар Апас халык театры артистлары чыгышын бик җылы каршы алды. Режиссер Земфира Мухаметшина куйган «Саф күңелгә тап төшми» спектакле тамашачылар күңелендә онытылмас тәэсир калдырды. Хис-кичерешләр дулкын белән каплады: шатлык һәм сагыш яшьләре, күңелне нечкәртә торган мизгелләрдә көлү – болар барысы да чын рухи бердәмлек атмосферасы тудырды. Спектакль гаять тирән һәм эчтәлекле, ул һәр тамашачыны геройлар тарихы белән бергә яшәргә мәҗбүр итте.

Апас халык театры артистлары чараны оештырган өчен Дзержинск шәһәренең җирле татар автономиясе хезмәткәрләре, якты йөзләре һәм җылы алкышлары өчен – тамашачыларга, Апас районы башлыгы Җиһаншин Айрат Габделхак улына, Апас мәдәният бүлеге җитәкчесе Минһаҗиев Рөстәм Хәсип улына ярдәмләре өчен рәхмәтләрен белдерә.

Ерак юлларны якын итеп, халыкны таң калдырып кайткан театр артистларына да, мәдәният волонтерларына да бик зур рәхмәтләр җиткерәсе килә.