Форма поиска
5 май көнне Апас районы Мәдәният йорты зур кунакларны каршы алды. Якташыбыз, танылган композитор Сара Садыйкованың кызы Әлфия ханым Айдарская тарафыннан әзерләнгән чара Бөек җиңүнең 79 еллыгына багышланган иде.
Зур концерт программасын тамаша кылырга районыбызның өлкәннәре генә түгел, урта буын һәм яшьләр дә килгәннәр иде. Әлеге чарада Апасыбызның горурлыгы булган Сара Садыйкованың иҗат җимешләре яңгырады. Концертны оештыруга зур көч куйган Әлфия Айдарская бигрәк тә Сара ханымның Бөек Ватан сугышына, Бөек җиңүгә багышланган матур җырларына басым ясаган. Татарстанның халык артистлары Лариса Маслова, Мингол Галиев, Рөстәм Асаев белән беррәттән Татарстанның атказанган артистлары Айдар Габдинов, Әхмәт Кәримов, Рөстәм Гыйльфанов, Динә Закирова да Апас сәхнәсендә матур итеп чыгыш ясадылар.
Тере тавыш, җанлы музыкага сусаган тамашачы кунакларны кайнар алкышларга күмде һәм үзенең соклануларын белдереп, чәчәк бәйләмнәре бүләк иттел. Югары сәнгать әсәрләрен җиренә җиткереп башкарган Ильяс Камалов, Гөлнара Байназарова, Айгөл Мостафина, Рөстәм Егоров, Диләрә Хәйдәрҗанова, Айгөл Зайнуллинаның чыгышларын да райондашларыбыз бик җылы кабул итте. Чараны Татарстан республикасы Дәүләт музее фәнни хезмәткәре Данис Хисматуллин алып барды.
Калфаклы сандугачыбыз Сара ханым Садыйкованың иҗатын, аның турындагы истәлекләрне яңарту дәвамлы булыр дип ышана чараны оештыручылар.
Башка яңалыклар
28.05.2025
